Мицкоски ги алармира и амбасадите: Законите за автопатите се пристигнати со европско знаменце

Лидерот на опозициската ВМРО-ДПМНЕ, Христијан Мицкоски, тврди дека во Собранието веќе се доставени измените на законите за автопатите, со европско знаменце. Тој го спори ваквиот пристап и ги повика амбасадите да реагираат.

„Веќе законите се пристигнати во парламент со европско знаменце. Јас ова нема да го коментирам, ќе оставам од Канцеларијата на европската комисија тоа да биде искоментирано од нив. Ако не се случи, ќе отвориме јавна дебата по тоа прашање. Верзиите кои ги видовме, во делот пет, кој се користи за објаснување со кој дел од европската регулатива се усогласува овој закон, замислете, во овие предлози е празен. Нема, не стои таму во што се усогласува. Ако до пред неколку минути имаа намера, сега сакам да ве информирам дека добивме информација дека законите се пристигнати со европско знаемнце во парламентот. Ги повикувам амбасадите на земјите од ЕУ да се произнесат за ова што денеска го направи Владата на ДУИ и СДСМ“, вели Мицкоски.

Владата усвои измени на пет закони поврзани со изградбата на автопатите на коридорите 8 и 10д и ги достави до Собранието со европско знаменце. Целта им била да не бидат блокирани од опозицијата. Од Делегацијата на Европската унија во државава се изјаснија дека тоа не е согласно европските стандарди и најавија дека ќе бараат дополнително објаснување.