Компанијата Мета (Meta) започна со заклучување на стотици илјади профили на Instagram, Facebook и Threads, во пресрет на официјалното стапување во сила на новиот закон за онлајн безбедност во Австралија, објави агенцијата „Ројтерс“.
Комесарот за е-безбедност, Џули Инман Грант, првично изразила загриженост за „суровиот“ пристап кон блокирање на помладите корисници, но подоцна ја поддржала мерката, откако постепените регулаторни промени покажале недоволна ефикасност.
Грант нагласи дека платформите мора да ја преземат одговорноста:
„Стигнавме до пресвртна точка. Нашите податоци се валутата што ги движи овие компании, а дизајнот на платформите содржи моќни, штетни и измамнички карактеристики против кои дури и возрасните се борат жестоко. Какви шанси имаат нашите деца“, рече таа.
Новиот закон предвидува казни до 33 милиони американски долари за оние платформи кои нема да го почитуваат. Компаниите како Meta, TikTok, Snapchat и YouTube најавија дека ќе се придржуваат кон забраната.
Според eSafety, околу 96 проценти од австралиските тинејџери под 16 години веќе имаат профили на социјалните мрежи. Многу платформи им дозволуваат на малолетниците да ги преземат своите податоци, да го избришат својот профил или да го замрзнат додека не наполнат 16 години.
Инман Грант додаде дека лобирањето на платформите вклучувало и обид да се влијае врз американската влада, која ја повикала да сведочи пред конгресен комитет за прашањето на слободата на говорот.
Родителите во Австралија ја поздравија забраната, велејќи дека таа ќе им даде на децата повеќе време за одмор и минување време со семејството.