Августовската сесија од екстерните испити за матура започнува денеска, а ќе продолжи и во петок, 14 август. Испитите ќе се полагаат со почеток во 9 часот.
Според податоците на Државниот испитен центар, за августовскиот рок се пријавени вкупно 1.460 кандидати – 1.328 за државна матура, 126 за стручна и шест за уметничка матура.
Денеска матурантите ќе го полагаат изборниот екстерен испит, односно математика или англиски јазик. За другите странски јазици и за историја нема пријавени кандидати. Во петок ќе се полага задолжителниот испит по мајчин јазик и литература.
Поради значително помалиот број кандидати во однос на јунската сесија, августовското полагање ќе се организира во четири градови, на осум локации. Испити ќе има на факултети во Скопје, Тетово, Прилеп и Штип, како и во спортската сала на АСУЦ „Боро Петрушевски“ во Скопје.
Во августовскиот рок ќе полагаат и 226 матуранти на кои им бил поништен испитот во јуни поради утврдено препишување.
Инаку, просечната оценка на трите типа матура во јунската сесија изнесува 3,66. Кај државната матура просекот е 3,62, кај стручната 3,91, а кај уметничката 3,59.
Во јунскиот рок биле пријавени 14.587 ученици, а на испитите не се појавиле 348 кандидати. По објавувањето на резултатите биле поднесени 805 приговори, од кои дел биле прифатени.