Образовниот систем денес е распарчен, бирократизиран и брутално партизиран, а законите што се носат нанесуваат сериозни штети врз квалитетот на образованието, изјави денеска Јованче Манасков од Комисијата за образование на СДСМ на прес-конференција.
Манасков посочи дека средното и високото образование станале класна бариера каде што успеваат само оние со подлабок џеб. Според него, во програмата „Твоја држава – твоја шанса”, опозициската партија нуди нов пристап и конкретни решенија кои предвидуваат систем во кој учениците нема да учат само за тест, туку за стекнување реално знаење.
Како клучна мерка за матурантите, СДСМ најави воведување на парична поддршка за дефицитарните и современите струки на пазарот на труд.
„Ќе обезбедиме ваучер од 2.000 евра за секој матурант за обуки за програмирање, вештачка интелигенција и зелени технологии – за да имаат пристап без финансиски трошок до најдобро платените работни места“, изјави Манасков.
Во делот на високото образование, партијата предвидува целосно бесплатни студии на државните универзитети, со цел факултетот да не претставува товар за семејниот буџет. Дополнително, се планира секој ученик да добие бесплатен персонален систем за учење базиран на вештачка интелигенција.
Платформата содржи и концепт за трансформација на факултетите во хабови за доживотно учење, каде граѓаните од сите возрасти ќе можат да добијат бесплатни „микро-квалификации“. Како поддршка за овој процес, предвидено е воведување дигитален пасош на знаење со државни ваучери наменети за преквалификација во текот на кариерата.
На прес-конференцијата беше ставен акцент и на материјалниот статус на просветните работници, со ветување за значително покачување на нивните месечни примања во јавниот сектор.
„Платата на наставникот да стане највисока во јавниот сектор, со најмалку 25% повисока од просечната нето плата во државата“, потенцираше Манасков.