Министерката за енергетика, рударство и минерални суровини, Сања Божиновска и нејзиниот хрватски колега, министерот за економија на Република Хрватска, Анте Шушњар, денеска во Охрид го потпишаа Меморандумот за разбирање и соработка во енергетскиот сектор меѓу двете земји.
Потпишувањето беше реализирано во рамките на работниот дел од посетата на висока хрватска делегација на земјава, предводена од премиерот на Хрватска, Андреј Пленковиќ.
Официјалниот дел од посетата донесе и потпишување на Договор меѓу Владата на Хрватска и на Македонија за стратешка соработка, кој беше парафиран од двајцата премиери, Христијан Мицкоски и Андреј Пленковиќ.
Активностите во Охрид беа заокружени со Бизнис форум каде пред претставниците на македонската и хрватската бизнис заедница беа презентирани можностите за реализација на нови проекти и инвестиции во енергетскиот сектор.
Министерката Божиновска во своето обраќање пред стопанствениците стави посебен акцент на геополитичкиот контекст на овој договор.
„ Енергетиката денес е една од најважните стратешки области за Европа и за целиот регион. Војната во Украина, како и случувањата на Блискиот Исток, јасно покажаа дека енергетската сигурност повеќе не е само економско, туку и геополитичко и безбедносно прашање. Затоа, државите кои знаат да соработуваат, да инвестираат и да градат заеднички инфраструктурни проекти, ќе бидат посилни, постабилни и поотпорни на идните предизвици“, истакна министерката Божиновска во своето обраќање на Форумот.
Денешниот меморандум се потпира врз стратешката определба на Македонија за членство во ЕУ, а се повикува на обврските од Договорот за Енергетска заедница за постепено усогласување со европското законодавство.
Главната цел на соработката меѓу двете министерства е зајакнување на енергетската безбедност, интеграција на обновливите извори на енергија и транзиција кон нискојаглеродни системи, како и регулаторна конвергенција со правилата на Унијата.
Од Министерството за енергетика, рударство и минерални суровини на крајот посочија дека ќе продолжат со проширување на регионалната соработка со цел воспоставување стабилен и сигурен енергетски систем.