Словенија вчера ги усвои измените на Законот за возачи, со кои им се овозможува на сопствениците на возачки дозволи од Северна Македонија да го заменат документот без полагање на практичниот дел од испитот, доколку имаат регулиран престој во земјата. Истата мерка важи и за државјани од БиХ, Србија, Црна Гора и Косово.
Според новите правила, македонските возачи ќе можат да ја заменат дозволата во рок од една година од пријавување на престој, при што ќе треба да достават здравствено уверение како доказ за ментална и физичка способност за управување возило.
Сандра Газинковски од партијата Слобода нагласи дека мерката е насочена кон поедноставување на административните процедури, а не кон доделување привилегии.
„Тоа е административна пречка која ги забавува процедурите за вработување и им создава непотребни трошоци, чекање и дополнителни тестови на луѓето“, изјави таа.
Опозицијата се спротивстави на измените, предупредувајќи дека ваквиот чекор може да има последици врз безбедноста во сообраќајот.