Министерството за надворешни работи и надворешна трговија (МНРиНТ) упати итен апел до сите македонски државјани кои во моментов се наоѓаат во Мексико, да ја напуштат земјата во првата безбедна можност. Причината е драматичното влошување на безбедносната состојба по убиството на водачот на моќниот картел Халиско, Немесио Осегуера – познат како Ел Менчо.
По воената рација во која беше ликвидиран нарко-босот, Мексико се соочува со бран на насилство. Членови на картелите блокираат патишта со запалени возила, а пожари се подметнуваат во продавници и аптеки низ повеќе држави. Хаосот не ги заобиколи ниту туристичките центри како Пуерто Ваљарта, каде се издигаат густи облаци чад меѓу хотелските згради.
МНР препорачува итно одложување на сите планирани патувања кон Мексико кои не се неопходни. За асистенција на нашите државјани, министерството ги стави на располагање 24-часовните дежурни линии и амбасадата во Вашингтон.