Левица: Водостопанство оттуѓува имот за згради на Фатмир Етеми
„Водостопанство оттуѓува имот за згради на Фатмир Етеми“. Оваа порака ја испраќаат вечерва од политичката партија Левица во соопштение испратено до медиумите.
„Локман Љимани, главен извршен директор на АД „Водостопанство“, поднесол барање до Комисијата за урбанизам на Град Скопје, со кое бара на земјиште во сопственост на ова државно претпријатие да бидат вцртани станбени објекти.
Се работи за атрактивно земјиште, лоцирано кај стадионот Локомотив во општина Карпош.
Лимани, кој порано беше и директор на Државен градежен инспекторат, сега бара наместо зеленило кое е предвидено со последната верзија на ДУП-от, да бидат вцртани станбени згради.
АД „Водостопанство“, како акционерско друштво во државна сопственост, треба да ги заштитува и застапува потребите и интересите на жителите на Република Македонија. Во овој случај, барањето за вцртување на станбени згради е во целост спротивно на потребите на жителите на Општина Карпош“, се наведува во соопштението на Левица.
„Истовремено, до Левица пристигнаа информации дека Лимани ова барање го доставил по налог на контроверзниот инвеститор, Фатмир Етеми, кој подоцна треба да го купи имотот.
Јавно го повикуваме Локман Љимани да објасни какви потреби АД „Водостопанство“ има од станбени згради.
Исто така, алармираме Комисијата за урбанизам на Град Скопје по ова барање да постапи согласно потребите на жителите на Општина Карпош, а не граѓаните да бидат жртви на уште едно сценарио како случајот со Мајчин дом“, дополнуваат од опозициската партија.
21.09.2022 - 20:44
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа
