Левица предлага работниците да добиваат патни трошоци

Пратениците од Левица предлагаат измени на законот за работни односи со кои работниците би добивале патни трошоци, како што тоа го добиваат пратениците.

-Со години гледаме како пратениците во ова Собрание си наплаќаат патни трошоци за фиктивни релации за патарини и амортизации на нивните возила. Додека тие ги полнат џебовите со народни пари, илјадници работници низ државата сами ги покриваат своите трошоци за да стигнат на работа и да обезбедат леб за своите семејства, рече пратеникот Амар Мециновиќ на прес-конференција во Собранието.

Вели, измените кои ги предлага Левица доаѓаат во момент кога минималната синдикална кошница расте, а трошоците за транспорт на едно семејство се движеле мешу 7 и 8%.

-Нудиме измени во членот 113 во Законот за работни односи и велиме: Доколку превоз работниците до и од работните места не е организирано од страна на работодавачот, работникот има право на надомест на трошоци по истата формула која ја понудивме за пратениците, 6,5 литри, реална цена на секои 100 километри изминати. Оваа е мерка за подобрување на животниот стандард на граѓаните во услови кога граѓаните се иззема од трипартитниот дијалог и кога одбива да ги зголеми платите за време на ценовни шокови за нашите граѓани, рече Мециновиќ.