Пратеникот и член на Извршниот комитет на ВМРО-ДПМНЕ, Миле Лефков, на денешната прес-конференција упати критики до опозициската СДС и нејзиниот лидер Венко Филипче, обвинувајќи ги за обиди за создавање паника и хаос меѓу граѓаните.
Според Лефков, по пропаѓањето на тврдењата околу исправноста на водата, од СДС нема ниту извинување ниту преземање одговорност, туку се продолжува со пласирање дезинформации.
„Откако обидите за создавање паника околу водата пропаднаа пред фактите, од СДС нема ниту извинување, ниту преземање одговорност за кажаното. Напротив, продолжуваат со истата матрица, нов ден, нова конструкција и нов обид за создавање хаос. Тоа е разликата која граѓаните ја гледаат. Додека СДС произведува политички приказни, ВМРО-ДПМНЕ работи и испорачува резултати“, истакна Лефков.
Тој директно го прозва претседателот на СДС, соопштувајќи дека не може да се избегне одговорноста за политиките што ги води партијата.
„Филипче може да одмора со Заев во Паљури, на милионската јахта, но не може бесконечно да бега од одговорноста за политиката што ја води неговата партија. СДС треба да одговори, зошто ниту еден пакет вода не донираа за Гостивар и зошто не го повикаа градоначалникот Лимани на одговорност? До кога секој нивен политички неуспех ќе го покриваат со нова дезинформација и нов обид за паника?“, рече тој.
На крајот од своето обраќање, пратеникот потенцираше дека граѓаните веќе ја препознаваат оваа пракса на опозицијата.
„Граѓаните веќе ја препознаваат оваа матрица. Македонија има потреба од одговорност и работа, а не од опозиција која сопствениот недостаток на идеи се обидува да го надомести со хаос и страв“, заклучи Лефков.