Кузеска: СДСМ се менува и поставува нови стандарди, ВМРО-ДПМНЕ е заглавена во криминално-режимска матрица

СДСМ вчера го одржа 25иот Конгрес, кој за првпат се одржа дигитално, на далечина со што се испочитуваа мерките и задолженијата за заштита од коронавирусот. Со тоа, поставивме нови стандарди во поглед на организација, дигитализација и партиско делување во Република Северна Македонија. И додека СДСМ согласно Статутот одржува Конгрес по изборите на кои победи, губитникот Христијан Мицкоски бега и од самата помисла да одржи Конгрес на партијата иако тоа од него го бара сериозен дел од членството.

Ова денеска на прес-конференција во партиското седиште го истакна портпаролката на СДСМ, Богданка Кузеска. Според неа, со статутарните промени СДСМ покажала дека знае и да победува и да се менува.

-Партијата дополнително се демократизира и се отвора кон членството и граѓаните. Во исто време, во ВМРО-ДПМНЕ се е исто, тоа е партија која нема капацитет ниту волја за реформи, за унапредување на внатрепартиска демократија. Со политиките на СДСМ државата оди напред. Денес сме 30 земја членка на НАТО и наскоро започнуваме преговори за членство во ЕУ. Со ВМРО-ДПМНЕ има само враќање назад, назад кон изолација и неизвесност. СДСМ е отчетна партија, посветена на правда, ред и дисциплина, затоа воведуваме Кодекс за однесување на членовите на СДСМ. Истовремено, ВМРО-ДПМНЕ е длабоко заглавена во криминалната матрица, партијата предводена од Мицкоски знае само да го брани криминалот и криминалците во редовите на ВМРО-ДПМНЕ, рече Кузеска.

Според неа, поради тоа СДСМ во последните години ја добива довеербата од граѓаните, а Мицкоски губи три пати по ред на избори.