Кризниот штаб на Општина Куманово одржа седница по силното невреме што вчера го зафати градот и околината, при што беа сумирани првичните информации од сите надлежни институции.
Службите работеа во текот на вчерашниот ден, ноќта и утринава, а приоритет беа расчистувањето на сообраќајниците, отстранувањето на опасните дрвја и санацијата на штетите.
Секретарката на Општина Куманово, Емилија Сладарис Јаневска, истакна дека општинските тимови брзо реагирале на терен:
„Благодарение на екипите на ЈП „Чистота и зеленило“, Територијалната противпожарна единица, Дирекцијата за заштита и спасување и останатите служби, брзо се интервенираше на терен и се расчистуваа последиците во текот на вчерашниот ден, ноќта и утринските часови“, изјави Јаневска.
Таа додаде дека централното градско подрачје веќе има струја, додека екипите на ЕВН продолжуваат со санација во приградските населби и селата.
Општата болница во Куманово функционира непречено откако беа отстранети паднатите дрвја од дворот и беше воспоставено снабдувањето со електрична енергија.
Командирот на ТППЕ Куманово, Борис Станковски, соопшти дека пожарникарите реализирале повеќе од дваесет интервенции за отстранување на покриви, дрвја и испумпување вода:
„Најголем дел од интервенциите беа за отстранување на откорнати лимени кровови, расчистување на паднати дрвја и гранки, како и испумпување на вода од поплавени подруми и објекти. Имавме и интервенција за извлекување лице заглавено во автомобил поради надојдена вода на крстосницата на улиците „Доне Божинов“ и „Октомвриска револуција“, но за среќа немаше посериозни последици“, изјави Станковски.
Директорот на ЈП „Чистота и зеленило“, Сашо Томиќ, посочи дека се евидентирани над 100 паднати дрвја на јавни и приватни површини, а приоритет биле блокираните улици и тротоари.
„Работиме по приоритети. На одредени локации мора да почекаме ЕВН да ја исклучи електричната енергија, а полицијата да изврши увид пред да можеме безбедно да ги отстраниме паднатите дрвја или лимените конструкции“, нагласи Томиќ.
Во расчистувањето на регионалниот пат Куманово-Свети Николе, во координација со ЈП „Македонија пат“, се вклучија и осудени лица од КПУ Затвор Куманово.
Од Електродистрибуција информираа дека нивните екипи работат без прекин до целосно нормализирање на мрежата, додека надлежните оценија дека станува збор за едно од најсилните невремиња во Куманово во последните децении.