Мерката за субвенциониран општински линиски превоз во Куманово официјално завршува денеска, со што по повеќе од три години граѓаните повторно ќе мора да плаќаат билети за користење на локалните автобуски линии. Од Општина Куманово информираат дека од утре стапува на сила стариот систем на наплата според одлуките донесени од страна на локалниот Совет.
Официјалното соопштение пренесено преку социјалните мрежи ги дефинира крајните рокови на оваа мерка.
„Општина Куманово ги известува сите граѓани дека на ден 30.06.2026 година завршува мерката за субвенционирање на општинскиот линиски превоз, со која во изминатите три и пол години на граѓаните им беше овозможено користење на општинскиот превоз без директно плаќање на билет“, стои во известувањето.
Патниците кои ги користат услугите на јавниот превоз во Куманово веќе од утрешниот прв јули ќе се соочат со редовна тарифа при секое патување.
„Воедно, Ве известуваме дека од 01.07.2026 година повторно ќе се применува редовниот систем на наплата на билети, по утврдена висина на цена по билет, согласнo Одлука на Советот на Општина Куманово“, се наведува во објавата.