Српскиот претседател Александар Вучиќ изјави дека не ја разбира логиката на Соединетите Американски Држави во врска со санкциите кон Нафтената индустрија на Србија (НИС), нагласувајќи дека не очекува Вашингтон да ја промени одлуката за неиздавање лиценца за увоз на сурова нафта. Вучиќ предупреди дека без оваа лиценца, рафинеријата во Панчево би можела целосно да ја прекине работата.
Рафинеријата НИС, која е дел од рускиот енергетски сектор и веќе се соочува со американски санкции, остана без сурова нафта за преработка. Енергетските експерти предупредуваат дека евентуален застој во производството би довел до скап увоз на деривати, што би предизвикало синџирно зголемување на цените и дополнителен притисок врз инфлацијата.
Вашингтон повеќепати порача дека не сака никакво руско влијание во НИС и дека „руската сопственост мора да биде нула“. Србија претходно обезбедуваше сурова нафта преку хрватскиот нафтовод Јанаф, но протокот по оваа рута е исто така прекинат, што дополнително ја усложнува ситуацијата.
Српскиот претседател Александар Вучиќ истакна дека санкциите на САД се насочени кон целосно исклучување на руското управување и сопственост во Нафтената индустрија на Србија (НИС), што, според него, „не е засновано на меѓународното право“. Тој откри дека Србија има рок од 50 дена да најде нов купувач за НИС, а како една од опциите се разгледува и понудата од унгарската компанија МОЛ.
„Ние сме мала земја и не можеме да функционираме без нафта. Не ја разбирам логиката на Американците и затоа ја повикувам меѓународната заедница да ги разбере последиците од санкциите“, изјави Вучиќ, додавајќи дека, и покрај критиките од Вашингтон, Брисел и Москва, „останува горд на својата позиција“.
Тој додаде дека Србија ќе продолжи да бара решение кое ќе ја гарантира енергетската стабилност на земјата, нагласувајќи дека ситуацијата е исклучително чувствителна и дека секојдневно се водат разговори со потенцијални партнери.