Управата за финансиска полиција поднесе кривична пријава до Основното јавно обвинителство Тетово против службено лице вработено на Меѓународниот универзитет во Тетово, поради сомнение за злоупотреба на службената положба и овластувањето и фалсификување исправа.
Од УФП информираат дека пријавениот А.З., кој работел како административен службеник – виш соработник за логистика и теренско работење, во периодот од март 2020 до февруари 2023 година, ја злоупотребил службената положба со цел да стекне противправна имотна корист.
Според пријавата, наместо паричните средства што во готовина му биле доверени од студенти за уплати за партиципација, кофинансирање и други трошоци за студирање на повеќе факултети, тој не ги уплатил на сметката на Универзитетот преку платформата Е-pay, туку ги присвоил за себе.
Со тоа, како што наведуваат од Управата за финансиска полиција, стекнал противправна имотна корист во износ од 3.362.272 денари, а на Универзитетот му причинил штета во истиот износ.
За прикривање на дејствијата, пријавениот наводно изработувал лажни потврди за извршени уплати преку Е-pay, кои им ги доставувал на студентите како доказ дека трансакциите биле реализирани.
Од УФП додаваат дека при изработката на потврдите биле користени податоци од автентична потврда за уплата, по што биле менувани информациите за уплаќачот, износот и датумот. Студентите, верувајќи дека уплатите се извршени, документите ги прикачувале во електронскиот систем и ги доставувале до студентската служба.