Исчезнатиот германски турист, по кого грчката крајбрежна служба водеше обемна спасувачка акција од неделата попладне, е пронајден мртов во морскиот дел во близина на островот Сими, јавуваат медиумите од регионот.
Тој бил дел од групата од осум лица кои се наоѓале на едрилица која пловела без контрола откако патничките ја напуштиле.
Од крајбрежната служба на Грција соопштија дека телото било забележано и извлечено во утринските часови.
„Вчера, во утринските часови во морскиот дел западно од Сими било пронајдено безживотно тело кое било идентификувано како осмиот исчезнат патник од едрилицата“, информираа од крајбрежната служба.
Спасувачката акција започна во неделата попладне кога едрилицата со германските туристи била забележана како неконтролирано плови во морето.
Во потрагата веднаш биле ангажирани патролни бродови, брод за отворено море и хеликоптер „Супер Пума“.
Набрзо по почетокот на акцијата беа пронајдени и спасени седум од осумте патници. Двајца од туристите успеале сами да допливаат до брегот, еден бил пронајден од рибарски чамец, додека четири лица биле лоцирани на блискиот брег од страна на патролен чамец на крајбрежната служба.
Потрагата по последниот исчезнат патник продолжи и на море и на копно сè до вчерашниот ден, кога за жал беше потврдена неговата смрт.