Ковачки: Зошто е извадено името на кандидатите пред да бидат одобрени во НАТО?
Ден четврти. Министерот за одбрана и Претседателот Пендаровски се’ уште не се охрабруваат да излезат пред македонската јавност и да кажат кој и зошто ги прекршил процедурите при испраќање на нашите претставници во НАТО. Наместо тоа, како портпароли излегуваат истрошени и безбедносно неодговорни лица кои не ја познаваат законската регулатива и за жал, во јавност изнесуваат класифицирани, строго доверливи информации од класифицирани постапки, истакна вечерва членот на Извршниот комитет на ВМРО-ДПМНЕ, Драган Ковачки во „Коментар на денот“.
Според него, со овој, како што го нарече, ноншалантен однос кон класифицираните информации, само се потврдувала тезата дека интересот на партијата им е над се’ и дека законите за нив не важат.
-Овој однос е неприфатлив за земја членка на НАТО и земја претендент за ЕУ! Повторно го прашуваме министерот за одбрана: Каде Ви е прекршена процедурата, Ви кажа ли некој дека е можно да има безбедносна пречка пред да го објавите името на кандидатот во јавност или не? Ако ви кажал, зошто продолживте со процедурата и му направивте штета на човекот со тоа што го извадивте неговото име во јавност и зошто го нарушивте угледот на министерството и на државата? Чувствувате ли одговорност?, праша Ковачки.
Посочи дека лицата кои се одбиени се со потпис од министерката Шекеринска и претседателот на државата, Стево Пендаровски.
-За крај кратко и јасно, лицата кои се одбиени се со потпис на Шекеринска и Пендаровски. Да не се обидуваат да ја разводнуваат темата, и да понесат одговорност. Јавноста чека одговори, одважете се и одговорете на конкретните прашања. Сепак, плата земате од јавноста, или можеби заборавивте? Оставка, рече Ковачки.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа