Ковачевски: Ќе работам ден и ноќ да испорачам резултат, да ги исправиме грешките

„Знаевме дека нема да биде лесно да се работи во услови на најголема економска и енергетска криза. Но ние не се откажавме. Никого не оставивме сaм, силно ги поддржавме граѓаните и компаниите со 2,6 милијарди евра. И успеавме. Денеска гледаме дека сите тие мерки и политики вродиле плод. Инфлацијата е намалена и целосно ставена под контрола“, посочи претседателот на СДСМ, Димитар Ковачевски, на денешниот граѓански собир во Центар на кандидатот за Претседател, Стево Пендаровски.

„Ги зголемивме платите и пензиите и тоа на историски највисоко ниво досега. Ги зголемивме платите во здравството, во градинките, училиштата, високото образование никогаш немало поголеми плати. Но јас сум реален човек, не живеам во заблуда дека овие бројни мерки и економски политики ги решија сите проблеми на граѓаните“, рече Ковачевски.

„Но колку и да е тешко, ние имаме волја и знаење и тим да работиме и да испорачаме резултати. Постои начин, постои вистинска шанса за промена кон подобро. Ве уверувам дека нема лесни решенија за системските проблеми тука. Само продолжувањето на европскиот пат и усвојувањето на европските стандарди може да донесе реални промени“, беше дециден Ковачевски.

„Само членство во ЕУ ни гарантира европски животен стандард, европски институции, право и правичност за секој граѓанин. Нашата заедничка борба за иднината има суштинска цел, а не формална“, рече Ковачевски.