Генералниот секретар на НАТО Марк Руте, претседателката на Европската комисија Урсула фон дер Лајен и претседателот на Европскиот совет Антонио Кошта ќе учествуваат на утрешната средба во Париз на т.н. „Коалиција на подготвените“, посветена на состојбата во Украина, соопштија прес-службите на трите институции.
Од НАТО информираа дека средбата ќе биде копретседавана од францускиот претседател Емануел Макрон и британскиот премиер Кир Стармер, а по завршувањето на разговорите не се предвидени изјави за медиумите.
Во соопштението на Европскиот совет е цитиран претседателот Антонио Кошта, кој оценува дека единствениот начин Русија да биде привлечена кон мировни преговори е преку зајакнување на украинската страна.
Францускиот претседател Макрон на крајот од декември изјави дека разговорите во Париз ќе се фокусираат на безбедносните гаранции за Украина. Според него, учесниците во коалицијата на утрешната средба треба да го прецизираат својот конкретен придонес кон тие гаранции.
Во „Коалицијата на подготвените“ учествуваат 35 држави, како и НАТО и Европската комисија.