Киев соопшти дека во источна Украина се уште се водат тешки борби

Украинската војска денеска соопшти дека нејзините сили одбиле десетици нови напади на руските војници, пренесе ДПА.

Вкупно 79 руски напади, некои со артилериска и воздушна поддршка, беа пријавени од фронтовите во источна Украина, соопшти Генералштабот во Киев во својот дневен извештај за состојбата.

Фокусна точка повторно беше областа околу Покровск на работ на Донбас. Таму, руските единици се обидоа да ги зајакнат и прошират територијалните придобивки постигнати претходниот ден. Севкупно, украинските војници во оваа област беа подложени на 20 напади во последниот ден, се вели во извештајот.

Слични тешки борби се регистрирани и во областа околу Торецк. Неколку напади на руските копнени трупи наводно биле одбиени откако руски борбени авиони со проектили ги нападнале украинските позиции и населени места.

Генералштабот не даде никакви информации за моменталниот статус на украинското напредување во јужниот руски регион Курск. Само е наведено дека руската авијација извршила неколку напади во областа, користејќи околу 20 летачки бомби.