Бројот на загинати во големиот пожар што зафати неколку висококатници во Хонг Конг се искачи на 65 лица, соопштија локалните служби за итни случаи. Во трагедијата, која се случи во областа Тај По, повредени се уште 70 луѓе, меѓу кои и 10 пожарникари. Бројот на исчезнати не е целосно познат, но властите претходно проценија дека 279 лица се водат како исчезнати.
Пожарот избувна вчера попладне и зафати седум од осумте висококатници во станбениот комплекс Wang Fuk Court, кој брои околу 2.000 станови. Повеќе од 1.200 пожарникари се ангажирани во гаснењето. Иако ситуацијата е делумно стабилизирана, огнот и денеска продолжува да гори во три од зградите.
Првичните информации укажуваат дека бамбусовите скелиња, поставени за време на реновирање на 32-катните згради, веројатно придонеле огнот да се прошири со исклучителна брзина.
Полицијата приведе тројца мажи од една градежна компанија, под сомнение за убиство од небрежност. Според властите, материјалите употребени за градежните работи можеби не биле согласно пропишаните стандарди за заштита од пожар.
Шефот на владата на Хонг Конг, Џон Ли, нареди итна инспекција на сите објекти што се во процес на поголемо реновирање низ територијата.