Страшна железничка несреќа ја потресе Шпанија вчеравечер, кога во директен судир на два воза во Адамуз, во близина на Кордоба, загинаа најмалку 39 лица, а повеќе од 150 се повредени. Трагедијата се случила кога еден од возовите излетал од шините и преминал на соседната пруга во моментот кога минувал друг воз.
Несреќата се случила околу 19:40 часот. Последните три вагони од возот „Ирјо“, кој сообраќал на линијата Малага-Мадрид со 317 патници, излетале од шините и се нашле на патот на возот „Ренфе“, кој се движел во спротивна насока со брзина од околу 200 км/ч. Од силината на ударот, и вториот воз излетал од шините.
Министерот за транспорт, Оскар Пуенте, потврди дека несреќата се случила на рамен дел од пругата, а возот „Ирјо“ бил речиси нов (произведен 2022) и поминал редовна проверка пред само четири дена. Спасувачките екипи и натаму се на терен и се обидуваат да стигнат до настраданите.