Ненадејни поплави предизвикани од земјотрес и лавина направија пустош во планинските региони на Непал и Тибет, оставајќи зад себе десетици жртви и стотици исчезнати.
Во Непал досега се потврдени 19 загинати, додека кинеските власти соопштија за сериозни жртви во регионот на Тибет.
„Има пустош каде и да погледнеме. Населбите покрај реката се целосно однесени. Петмина мои роднини се водат како исчезнати“, сведочи Тула Бахадур Б.К., здравствен работник од округот Расува.
Меѓу исчезнатите се наоѓаат 384 патници, од кои дури 291 се странски туристи, како и десетици полицајци и локални работници.
„Досега имаме потврда за само 26 полицајци кои се водат како исчезнати во поплавата. Исто така, недостасуваат информации за владини службеници за приходи, работници во хидроенергијата, меѓу другите. Но, сè уште ги собираме податоците“, соопштија од полицијата.
Спасувачките екипи се соочуваат со огромни проблеми бидејќи високото ниво на водата не им дозволува на хеликоптерите да слетаат во најпогодените подрачја.
Непалскиот премиер Балендра Шах апелираше на брза евакуација на населението.
„Дадени се инструкции… луѓето што живеат во пониските области да се преместат на побезбедни места. На луѓето покрај реката им се советува да бидат дополнително внимателни и да останат будни“, порача тој.
Итно дејствување побара и кинескиот претседател Си Џинпинг, посочувајќи дека „најитната задача е да се направи сè што е можно за да се пронајдат и спасат исчезнатите лица… брзо да се лекуваат повредените лица и да се минимизираат жртвите во најголема можна мера“.
Постои реална опасност од нов поплавен бран.
„Со оглед на тоа што блокадата сè уште е заглавена низводно на реката на границата меѓу Непал и Кина, властите предупредуваат дека може да се случи втора поплава“, изјави Ќанггонг Жанг од Меѓународниот центар за интегриран планински развој.