Германскиот канцелар Фридрих Мерц упати сериозно предупредување до нацијата, истакнувајќи дека земјата влегува во период на радикални промени и ги повика граѓаните и бизнис-секторот на трпение. Во своето обраќање на економската конференција во Северна Рајна-Вестфалија, тој ја опиша моменталната глобална состојба како „епохална пресвртница“.
Мерц појасни дека Германија се наоѓа пред сложен двоен предизвик: од една страна е под силен удар на глобалните геоекономски земјотреси, а од друга страна трпи притисок од сопствените структурни проблеми кои се акумулирале со години.
„Сведоци сме на длабока историска пресвртница што секоја генерација ја доживува само еднаш. Ние, кои сме родени по Втората светска војна, досега едноставно имавме среќа. Но, сега, 80 години по завршувањето на војната, го доживуваме она што секоја генерација во претходните векови го доживеала“, истакна канцеларот.
Тој најави дека владата планира дополнително да го забрза процесот на реформи, и покрај засилените социјални и политички притисоци. Оваа негова порака доаѓа како одговор на фрустрациите на претприемачите од Северна Рајна-Вестфалија, кои отворено побараа поголема „реформска храброст“ и забрзување на промените.
Сепак, политичката заднина на овие реформи е прилично нестабилна. Владејачката коалиција на ЦДУ, ЦСУ и СПД неодамна ја заврши својата прва година на власт, период во кој нејзиниот рејтинг континуирано опаѓа. Истовремено, десничарската опозиција бележи силен раст – поддршката за „Алтернатива за Германија“ (АфД) е во постојан подем, достигнувајќи нивоа кои во одредени анкети ја израмнуваат со најсилните политички партии во земјата.