Во пресрет на летната сезона и зголемениот ризик од пожари, ЈП „Национални шуми“, во соработка со Противпожарниот сојуз на Град Скопје и Дирекцијата за заштита и спасување, денеска ќе организира едукативно-превентивна кампања на Плоштад Македонија. Настанот ќе се одржи од 11 до 13 часот.
Целта на кампањата е да се подигне јавната свест за опасностите од пожари и да се поттикне поголема одговорност кај граѓаните во заштитата на природата и животната средина.
Посебен акцент ќе биде ставен на зачувувањето на шумите и зелените површини во Скопје, вклучувајќи ги парк-шумите, парковите и излетничките места во околината, како и на спречувањето на пожари што можат да предизвикаат значителни материјални штети.
Во рамки на активностите ќе се дистрибуираат едукативни флаери и постери, а во кампањата ќе се вклучат и ученици од основните училишта во Скопје, кои ќе помогнат во информирањето на граѓаните за мерките за превенција и заштита од пожари.