Министерката за образование и наука, Весна Јаневска, денеска во Тетово упати силно предупредување до директорите на училиштата во врска со недостигот на учебници, потенцирајќи дека проблемот е системски решен, а одговорноста е кај менаџментот на училиштата.
Министерката нагласи дека се обезбедени средства, нови наставни програми и се печатат нови учебници, а сега фали само функционалност меѓу институциите.
„Оваа година многу слободно ќе кажам, „прогледав низ прсти“. Следната година нема да прогледуваме низ прсти. Има систем, има упатство, има правилник. Директорите се должни да ги почитуваат законите и да си ги нарачаат учебниците… Обраќајте се на директорите, не на министерството,“ изјави Јаневска.
Таа порача дека директорите мора многу посериозно да си ја сфатат работата како дел од системот и да си нарачаат доволен број учебници.
Во врска со забелешките за политички уцени при вработување на наставници со договор на дело, министерката не се согласи со констатацијата, но нагласи дека е против злоупотреби и најави: нов закон за наставници со цел во образованието да влезат најквалитетните и мотивирани кадри и оптимизација на училишната мрежа.
За разлика од лани, сега 200 училишта работат во една смена (лани 150), но поради намалениот број ученици, директорите мора да се организираат и да ги заштитат наставниците преку додатна, дополнителна настава и клубови.
Изјавите беа дадени пред панел-дискусијата „Каква магија се крие зад една петка – минатото и сегашноста во дуел“, во рамки на кампањата на МОН „Магијата е во знаењето“.