Јанева нема да биде спроведена во судот за да ја чуе пресудата за „Рекет“

По шест месеци судење денеска Крвичниот суд Скопје, ќе ја објави пресудата за предметот „Рекет”, каде обвинети се Бојан Јовановски – Боки 13 и Катица Јанева. 

Катица Јанева поднела барање до судот да не биде спроведена од страна на полицијата во судот каде ќе биде соопштена пресудата за „Рекет“, дознава „А1он“ од извори во судот.

Информацијата ја потврди и Ирена Фрчковска, бранител на Јанева во судскиот процес, но не даде објаснување која е причината поради која нејзиниот клиент одбива да присуствува на крајот од судскиот процес.

Вакво барање не поднел првообвинетиот Бојан Јовановски-Боки 13 и тој ќе биде спроведен од Истражниот затвор „Скопје“ во Шутка во судот, каде ќе ја чуе пресудата донесена од судечкиот совет.

 Во тек на овој судски процес беа презенитрани низа материјални и вербални докази.

Текот на предметот предизвика голем интерес во јавноста, често изјавите на сведоците, обвинетите или обвинителството беа теми на денот. Поради големиот медиусмки интерес Основниот кривичен суд одлучи пресудата да биде објавена во големата сала на Врховниот суд.

Во описот на обвинителниот акт покренат од Обвинителството за борба против организираниот криминал и корупција, се вели дека обвинетиот Бојан Јовановски, влијаел врз обвинетата Катица Јанева, за таа да донесе поблаги мерки против Јордан Камчев, обвинет во предметот „Империја”, случај кој го почна поранешното Специјално јавно обвинителство.

Јовановски и Јанева во своите завршни зборови пред судот негираа вина и рекоа дека не го сториле делото за кое се товарат. Обвинителството, според нив, не изнело докази за делото за кое ги товари и дека целото обвинение е врз основа на исказ на еден сведок – кој е оштетен во случајот. Целиот случај за Јовановски е политичка конструкција, додека за Јанева е клевета.

Судењето за предметот „Рекет” почна во ноември минатата година. Обвинението беше поднесено против три лица. На првото рочиште за овој случај обвинетитот Зоран Милевски-Кичеец ја прифати вината и на следното рочиште беше осуден на три години затвор. Другите двајца обвинети Јовановски и Јанева, се изјаснија дека се невини и против нив се води судска постапка во која беа презентирани низа материјални и вербални докази од страна на Обвинителството.