Трет пожар попладнево изби на територијата на Општина Штип, со што дополнително се засили борбата со огнената стихија во овој регион.
Новиот оган е лоциран помеѓу објектите на Штипската млекара и текстилната конфекција „Албатрос“, каде што гори сува трева.
Поради сериозноста на состојбата и ширењето на пламенот, пред половина час беше извршена итна евакуација на текстилните работнички од конфекцијата „Албатрос“.
На терен во моментов интервенираат екипи на ТППЕ Штип, доброволци од ДПД Штип, полициски службеници и локално население од населбата Каленица.
Паралелно со ова, пожарникарите успеаја да го локализираат големиот пожар на тврдината Исар, кој претходно сериозно се приближи до куќите во истоимената населба.
Според тврдењата на очевидци, пожарот кај тврдината Исар започнал по искрење на жица од електричен столб во околината.
Сериозна материјална штета е регистрирана и во штипското село Чардаклија, каде попладнево целосно изгоре фотоволтаична централа.
Крај стариот регионален пат, на местото каде што огнот се ширел од фотоволтаичната централа, се уште се забележува тлеење на теренот.
Градоначалникот на Општина Штип, Иван Јорданов, веќе информираше дека вкупната материјална штета од денешните пожари е голема.