Група дрвокрадци синоќа во Прилеп намерно предизвикале судир со службено возило на Шумската полиција во обид да избегаат од местото на настанот.
Заменик-директорот на ЈП „Национални шуми“, Кире Михаилов, потврди дека инцидентот завршил со приведување на две лица на самото место, додека по други две лица, кои се веќе идентификувани, се трага.
Возилата што ги користеле сторителите, како и бесправно исеченото огревно дрво, се одземени и предадени во подружницата „Црн Бор“ – Прилеп. Увид на местото извршила екипа на МВР доцна во ноќта.
„Инаку се работи за добро познати дрвокрадци за кои и претходно има поднесувано пријави за дела поврзани со дрвокрадството. Нема да отстапиме од оваа битка, не знам како повеќе треба да им објасниме на овие луѓе“, објави Михаилов.