Петтото издание на форумот „EU Meets the Balkans“ вчера во Софија собра претставници на европските институции, политичари, експерти и претставници на граѓанското општество, кои разговараа за иднината на Балканот и перспективите на регионот во рамките на Европската Унија.
Меѓу водечките теми на дискусиите беа геополитичките предизвици со кои се соочува Европа, иднината на европската интеграција, потребата од појасна политичка посветеност кон Балканот, како и начините на кои регионот може да го претвори својот потенцијал во двигател на европската иднина.
„Треба да ја пронајдеме формулата и со политичката храброст и амбиција со кои Бугарија и Романија влегоа во Европската Унија, да продолжиме со обединувањето на Европа“, изјави бугарскиот европратеник од „Renew Europe“ и поранешен специјален известувач на Европскиот парламент за Македонија, Илхан Ќучук, на отворањето на форумот.
Според него, внатрешната реформа на Европската Унија е неопходна, но таа не треба да биде на штета на очекувањата на европските граѓани на Балканот. Во контекст на променливото геополитичко опкружување, посочи Ќучук, Европа треба да има јасна визија за улогата и иднината на регионот.
„Не станува збор само за технички критериуми, правила и процедури, туку за јасна политичка посветеност на Европската Унија кон Балканот. Геополитичките предизвици го наметнуваат тоа повеќе од кога било досега“, додаде европратеникот.
Тој истакна дека вреди да се стремиме кон идејата граѓаните на Балканот да живеат достоинствено, со разбирање дека не му припаѓаат само на минатото и на тешките историски прашања, туку дека можат обединети да гледаат кон иднината.
Од Македонија на форумот присуствуваше и претседателката на ЛДП, Моника Зајкова, која порача дека по повеќе од две децении ветувања, време е европската перспектива да стане реалност.
„Балканот има енергија, талент и амбиција да биде еден од најдинамичните региони во Европа. Да ја споиме таа балканска енергија со европски правила, функционални институции и кредибилно исполнување на преземените обврски. Тогаш на нашите граѓани нема да мораме уште еднаш да им кажуваме дека Европа е нивната иднина – тие конечно ќе можат да ја видат Европа во својата сегашност. Македонските граѓани не се уморни од реформите, туку од реформите без резултати, новите услови и политиката на блокади. Успешна европска Македонија е во интерес и на Бугарија и на Европа“, истакна Зајкова.
Форумот, организиран од Европскиот либерален форум (ELF), во соработка со партијата АЛДЕ и Атлантскиот клуб во Бугарија, петта година по ред го поставува прашањето за местото на Балканот во процесот на обединување на Европа во центарот на европската агенда.