Православните христијани во Македонија денеска со голема радост го прославуваат Рождеството Христово – Божик. Празничната атмосфера започна уште во раните утрински часови, кога верниците ги преплавија храмовите на Македонската православна црква-Охридска архиепископија.
Централното чествување традиционално се одржува во Соборниот храм „Свети Климент Охридски“ во Скопје. Со божикната литургија чиноначалствува архиепископот охридски и македонски г.г. Стефан, во сослужение со свештенослужители на Скопската епархија.
Верниците, по долгиот шестнеделен пост, денеска се причестуваат и го прославуваат празникот во кругот на своите семејства, споделувајќи ја радосната вест за раѓањето на Спасителот со поздравот „Христос се роди – Навистина се роди!“.