Средно училиште во италијанскиот град Пескара беше евакуирано откако во неговите простории беше детектиран силен мирис од непознато потекло, а голем број луѓе се разболеа, објавија денес италијанските медиуми.
Локалната здравствена служба ASL формираше тим на лице место составен од тројца лекари и три медицински сестри, а пет амбулантни возила со 20 лица пристигнаа во државното средно училиште Маркони во Пескара, објави телевизијата Раи.
Голем број луѓе кои се разболеа беа хоспитализирани, додека на други им беше укажана медицинска помош на лице место, а меѓу жртвите на труењето имало и некои пожарникари кои пристигнале да интервенираат откако биле повикани.
Според медицински извори, причина за труењето најверојатно е амонијак кој истекол од училишната лабораторија од причини кои засега се непознати, а се споменува и можно истекување на гас од климатизацијата.
Повеќе од 1.000 ученици во училиштето беа евакуирани откако беше подигната тревога, рече Раи.
Многу од учениците рекоа дека биле многу исплашени бидејќи не знаеле што се случува, а значителен број од нив се разболеле.
Заменик-градоначалничката на Пескара, Марија Рита Карота, наредила училиштето да биде затворено до понатамошно известување.
Таа рече дека училиштето ќе биде затворено за да се избегне каков било ризик по јавното здравје додека не се завршат сите технички проверки.