Вкупно 18 рудари во моментов се заробени во окната на рудникот „Трепча Југ“ како последица на проблеми со електричната енергија, објавија локалните медиуми. Првичните информации говорат дека прекинот на струјата ја оневозможил редовната комуникација и излезот од рудникот.
Претседателот на синдикатот, Ибрахим Јонузи, соопшти дека состојбата на рударите кои се наоѓаат под земја засега е добра, но предупреди на можни компликации.
„Состојбата на рударите заробени во окната засега е добра, но може да се влоши ако останат подолго“, изјави Јонузи.
Директорот на рудникот „Стари Трг“, Шиќири Садику, појасни дека драмата започнала уште во раните утрински часови, поточно околу 1 часот и 30 минути по полноќ. Тој додаде дека голем дел од нивните колеги веќе успеале безбедно да излезат.
„Повеќето од нив излегоа. Моментално, 18 рудари се уште се внатре, но работиме на наоѓање алтернативно решение. 50 рудари беа внатре“, потврди Садику, додавајќи дека здравствената состојба на преостанатите рудари е стабилна.
Овој рудник со кој управуваат институциите во Приштина подолг период се соочува со сериозни оперативни проблеми, поради што вработените често изразуваат револт преку штрајкови.