Бројот на загинатите во катастрофалните поплави што го зафатија јужниот дел на Тајланд се искачи на 33 лица, соопшти портпаролот на Владата, Сирипонг Ангкасакулкиат.
Минатонеделните поројни дождови предизвикаа надоаѓање на водите во десет јужни провинции, оставајќи зад себе уништена инфраструктура и илјадници евакуирани жители. Најтешко погоден е градот Хат Јаи, каде што е регистрирана рекордна количина врнежи во последните 300 години – само за еден ден паднале 335 милиметри дожд.
Властите распоредиле воени бродови, хеликоптери и спасувачки тимови за да стигнат до отсечените заедници. Медицинските екипи се подготвуваат еден носач на авиони да го претворат во пловечка болница, поради огромниот број повредени и болни граѓани кои имаат потреба од итна помош.
Дел од населението и натаму чека на покривите од своите домови, целосно опколено со вода. Според официјалните податоци, над два милиони луѓе се погодени од поплавите, но во привремените засолништа моментално се згрижени околу 13.000 лица.
Спасувачките операции продолжуваат, а властите предупредуваат дека бројките може дополнително да се зголемат.