Хаос на лет за Хјустон: Патник се обидел да ги отвори излезните врати

Авион на „Ол Нипон Ервејс“ од Токио до Хјустон бил пренасочен кон Сиетл во саботата откако еден патник се обидел да отвори две излезни врати за време на летот, потврдија ФБИ. Патникот бил совладан од членовите на екипажот и другите патници, а по слетувањето бил префрлен во болница на медицински преглед, соопшти ФБИ.

Летот АНА 114 полета од аеродромот Ханеда во Јапонија кон меѓународниот аеродром „Џорџ Буш“ во Хјустон, но беше пренасочен поради – според авиокомпанијата – „непослушен патник“.

Боингот 787-9 Дримлајнер бил во воздух приближно десет часа кога слетал на аеродромот Сиетл-Такома околу 4 часот наутро по локално време.

„Полицијата на аеродромот во Сиетл беше повикана поради пријава дека еден патник се обидувал да отвори излезна врата за време на летот“, изјави портпаролот Крис Гизло за Си-ен-ен.

Никој од другите патници и членови на екипажот не е повреден, додаде Гуизло. „Извештајот покажува дека пренасочувањето се случило поради инцидент со патник“, изјави портпарол на Федералната администрација за воздухопловство за Си-ен-ен.

По слетувањето во Сиетл, друг патник почнал да се однесува несоодветно, објави компанијата АНА. Според ФБИ, тој бил фрустриран поради пренасочувањето на летот и ја треснал вратата од тоалетот. „Лицето беше отстрането од авионот поради неприфатливо однесување пред летот да продолжи кон Хјустон“, рече Гизло. „Инцидентот не беше поврзан со претходниот, а патникот го напушти авионот без никакви проблеми.“

ФБИ додаде дека досега не се поднесени обвиненија во врска со инцидентот. Летот потоа продолжил кон Хјустон без никакви проблеми и слетал кратко пред 13:00 часот по локално време.