Речиси половина милион овци и кози, односно точно 479.821 грла добиток, се умртвени во Грција во периодот од август 2024 до 15 февруари годинава поради ширење на сипаницата. Според официјалните податоци од грчкото Министерство за земјоделство и Националната научна комисија, во овој период биле потврдени вкупно 2.015 случаи во 2.610 сточарски фарми. Само во последната недела од извештајот се регистрирани 11 нови случаи во седум различни региони.
Од надлежното министерство нагласуваат дека почитувањето на мерките за биолошка безбедност останува единствениот начин за ограничување на болеста. „Одгледувачите мора доследно да ги следат упатствата на ветеринарните служби и предвидените протоколи“, соопштија од Министерството за земјоделство на Грција, додавајќи дека податоците редовно ќе се ажурираат за навремено информирање на јавноста.
Ставот на грчката влада е дека вакцинацијата не е решение, ниту дел од државниот план за справување со кризата, туку фокусот останува на строгата имплементација на безбедносните мерки. Грчкиот премиер на неодамнешната средба со сточарите посочи дека приоритет е дефинитивното искоренување на болеста. Од друга страна, сточарите кои веќе неколку месеци протестираат во Атина, бараат итни решенија и поефикасни мерки за заштита на својот добиток.