Грчките земјоделци ќе одржат протест во Солун на 5 септември, на денот кога во градот официјално се отвора 90-тиот Меѓународен саем.
Одлуката е донесена на состанокот во Неа Малгара, каде што присуствуваа претставници на земјоделските здруженија од Солун, Лариса, Серес, Кардица, Иматија, Пиерија, Пела и Гревена.
Протестниот собир е закажан за 17:00 часот кај Белата кула во Солун, а земјоделците најавија дека на собирот ќе учествуваат и со трактори.
Меѓу нивните главни барања се поддршка на приходите, намалување на високите трошоци за производство, реформи во системот за земјоделско осигурување, заштита на субвенциите и воведување ограничувања на увозот.
Дополнително, земјоделските производители бараат ослободување од натрупаните долгови, зголемување на пензиите и соодветен надомест за сите претрпени загуби во секторот.
Овој протест е продолжение на барањата од јануари годинава, кога земјоделците ги прекинаа блокадите на главните патишта во Грција и предупредија дека ќе го блокираат Меѓународниот саем во Солун доколку надлежните не ги исполнат нивните барања.