Секој месец имаме околу 450 пријави за насилство врз жени, една од три жени која пријавува насилство, во својот мобилен телефон ја инсталира специјалната апликација „Panic Button“, а годишно имаме околу 5.000 инсталирани вакви апликации, посочи министерот за заштита на граѓаните на Грција Михалис Хрисохоидис во интервјуто за грчката телевизија „Антена“, јави дописничката на МИА од Атина.
По повод Меѓународниот ден против насилството врз жените, Хрисохоидис се осврна на податоците од полицијата, рече дека има зголемување на пријавите, зголемување на обвиненијата и зголемување на бројот на уапсени и притворени.
Посочи дека минатата година имале 18.500 предмети и уапсени 11.300 насилници, додека пак оваа година бројот е поголем, 19.500 предмети и 12.150 уапсени, оценувајќи дека 2025 година може да заврши со 20.000 случаи.
– Она што ме загрижува, но во исто време ме прави и оптимист, е дека од една страна се зголемуваат случаите, но всушност се зголемува бројот на пријавите. Односно, таму каде што целата оваа тема беше потоната во молк и вина, сега веќе излегува на површина, нагласи Хрисохоидис.
Пред повеќе од две и пол години беше воведена апликацијата „Panic Button“ на грчката полиција за помош на жени жртви на семејно насилство, а станува збор за специјална, тајна апликација за мобилните телефони што не дозволува трети лица кои можеби имаат пристап до уредот на жртвата да ја откријат апликацијата.
Жените жртви на семејно насилство, откако ќе ја инсталираат апликацијата на нивните мобилни телефони, со притискање на едно копче, можат итно и безбедно да ја известат полицијата доколку се во опасност.
Апликацијата мора претходно да биде инсталирана и активирана во полициска станица и ги содржи сите податоци на жртвата на семејно насилство.
– Често се активира „Panic Button“, а оваа година имаме зголемување на неговата употреба за 12 отсто, рече надлежниот грчки министер.