Македонската гранична полиција спречи обид за шверц на добиток од македонска на албанска територија, преку „зелениот појас“ на границата кај Дебар.
Според информациите од СВР Охрид, вчера околу 18:30 часот, полициски службеници од станицата „Блато“ пресретнале група од шест лица при контрола на граничниот појас кај месноста „Спаски дол“.
„Кога ја забележале полициската патрола, лицата се разбегале назад кон албанската територија, оставајќи го добитокот кој бил без ушна маркица“, изјави портпаролот на СВР Охрид, Стефан Димоски.
Групата илегално ја преминала границата и водела четири телиња кои биле без ушни маркици. Надлежните органи преземаат мерки за понатамошно постапување со запленетиот добиток.
Ова е еден од многуте неуспешни обиди за шверц, кој се одвива преку пограничните села кај Дебар. Во шверцот се вклучени македонски и албански граѓани, при што едните го обезбедуваат, а другите го преземаат добитокот. Шверцот е мотивиран од повисоката цена на месото и живиот добиток на територијата на Албанија.