Основното јавно обвинителство Струга поднесе обвинителен акт против шест лица за кривично дело „Оштетување или уништување на добра под привремена заштита или културно наследство или природни реткости“ од член 264 од Кривичниот законик.
Според ОЈО Струга, првообвинетиот, управител на градежна фирма од Велешта, како инвеститор и изведувач на работите за уривање на објект на парцела во непосредна близина на заштитената стара струшка куќа на Владо Малески, бил должен да изготви идеен проект со точно утврден начин на уривање.
Наместо тоа, тој изготвил само основен проект, без предвиден начин на уривање на стариот објект. По неговото отстранување, започнал изградба на нов објект со подрум, приземје и кат. При ископот за подрумските простории, според обвинението, со багер бил поткопан заедничкиот преграден ѕид, што довело до дестабилизација и уривање на соседната куќа, која била заштитена како културно наследство.
Обвинети се и градежен инженер и архитект од Секторот за урбанизам при Општина Струга. Тие, според обвинението, го изготвиле и одобриле одобрението за градење без да биде приложен идеен проект за уривање на претходниот објект, со што му помогнале на првообвинетиот.
Обвинението го опфаќа и тогашниот градоначалник на Општина Струга, кој го донел одобрението за градење, со кое, спротивно на решението на Управата за заштита на културното наследство, било дозволено изградба на подрум, покрај приземје и кат.
За помагање на првообвинетиот е обвинета и архитектка-конзерватор во Заводот за заштита на културното наследство и музеј – Охрид. Според ОЈО, таа изготвила мислење без забелешки за усогласеноста на проектот со насоките на Управата и ја заверила техничката документација, иако во неа била предвидена изградба на подрумски простории спротивно на решението на Управата.
Со дејствијата на обвинетите, на 15 октомври 2025 година, на улицата „Браќа Миладиновци“ во Струга била оштетена стара струшка куќа на Владо Малески, прогласена за значајно културно наследство.