Ѓорѓиевски: Во нормална држава Заев и Дончев уште денеска ќе беа со лисици на рацете

Во нормална држава Зоран Заев и Ден Дончев веќе ќе беа со лисици на рацете и ќе беа изведени пред судот, рече претставникот на ВМРО-ДПМНЕ, Орце Ѓорѓиевски, на денешната прес-конференција во однос на објавените снимки во текот на вчерашниот ден.

Како што рече тој, граѓаните имале шанса да слушнат како се одвивал рекетот врз стопанственици и инвеститори, а кој три години бил вообичаена пракса на власта.

„По ваква снимка, каде извршителот е инфлагранти фатен со сноп пари во рака, ЈО требаше уште веднаш да постапи и да го викне Дончев на распит, да отвори предмет против него и да го стави во притвор. Ништо од ова не се случи. Затоа што со ЈО за организиран криминал раководи Вилма Русковска, обвинител кој целосно ги игнорираше сите искази и докази на Боки 13, дека кај Заев завршиле парите од ‘Рекет’“, посочи претставникот на ВМРО-ДПМНЕ.

Ѓорѓиевски од името на својата партија го повика Обвинителството да покрене постапка против Дончев, но, како што рече, и против главата на криминалниот октопод, Зоран Заев.

„Доколку ги игнорираат видео и аудиоматеријалите кои излегоа во јавност директно се ставаат во услуга на криминалците од власта и стануваат нивни соучесници“, предупреди тој и додаде дека за сите инволвирани ќе има одговорност веднаш по воспоставувањето на правната држава во Република Македонија.