Германците се жалат: Во криза сме - секој трет Германец нема ни 1000 евра на страна

Се повеќе германски граѓани се соочуваат со големи финансиски потешкотии, а цените на енергенсите и на прехранбените производи би можеле дополнително да се зголемат во текот на есента и зимата, соопштено е денеска.

„Речиси една третина од германските граѓани, 32 отсто, не можат да издвојат 1.150 евра од финансиите со кои располагаат за ненадејни трошоци, на пример во случај на дефект на автомобил или потреба да купат некој уред“ – се вели во соопштението на Сојузниот завод за статистика во Визбаден, пренесува Индекс.хр.

Така, групата на овие граѓани е поголема отколку во Франција (27 отсто) или Холандија (15,1 отсто).

Во другите земји од Европската унија, како Хрватска, Романија, Грција, Кипар и Летонија, процентот на граѓани кои не можат да издвојат средства за ненадејни трошоци од сопствените заштеди надминува 40 проценти.

Во Германија, во 2021 година, две петтини од граѓаните располагале со помалку од 22.000 евра годишно.

Експертите сметаат дека материјалната состојба на граѓаните кои претходно имале финансиски проблеми дополнително се влошила за време на пандемијата на коронавирус и во последните месеци поради инфлацијата.

Во септември инфлацијата во Германија изнесуваше 10 отсто, а економскиот институт Ifo предвидува натамошен раст на цените.

„Поскапувањето пред се се однесува на струјата и гасот, но и на другите сегменти“ – изјави претседателот на Институтот „Ифо“ – Тимо Волмерсхаусер.

Според информациите од овој институт, повеќето трговски ланци планираат да ги зголемат цените во наредните недели и месеци, а истото важи и за рестораните и хотелиерите.

Минатата недела германската влада донесе нов пакет мерки во вредност од 200 милијарди евра, кои преку субвенции за енергенсите би им помогнале на граѓаните и стопанството да ја надминат новосоздадената финансиска состојба предизвикана од поскапувањето, пред се на енергетските производи.

05.10.2022 - 13:54

 

 

 

 

 

 

 

Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа

најчитано сега