„Изградбата на новиот административен-граѓански објект претставува еден од најзначајните идни проекти на Општина Центар. По многу години конечно успеавме да го добиеме земјиштето и сега можеме да започнеме со планирање“. Ова го изјави кандидатот за градоначалник на Општина Центар Горан Герасимовски во гостувањето на Утринско еспресо на Радио Лидер.
Тој, потенцираше дека целта на административна граѓанска зграда (општинска зграда) да биде „стаклена зграда“ – симбол на транспарентност и отвореност.
„Во неа граѓаните секојдневно ќе можат да добиваат информации за своите потреби. Просториите ќе бидат достапни и за невладини организации и други здруженија кои ќе можат да користат бесплатни канцеларии. Во рамките на зградата ќе има и модерна сала за седници на Советот, но нашата цел не е да се затвориме во институцијата, туку да создадеме простор кој ќе биде во постојана интеракција со граѓаните. Дел од канцелариите ќе ги користат и други институции, што ќе овозможи побрзо и поефикасно решавање на административните потреби. Со овој проект ќе се реши и долгогодишниот проблем со паркирањето во Дебар Маало. Ова е еден капитален проект кој планираме наскоро да го започнеме“, рече Герасимовски.