Герасимовски: Ќе формираме претпријатие за производство на електрична енергија

Градоначалникот на Општина Центар, Горан Герасимовски, учествуваше на вториот Социо- еколошки форум (СЕФ) во организација на Фондацијата „Фридрих Еберт“, Mеѓународниот центар „Олоф Палме“ и Прогрес – Институтот за социјална демократија.

Герасимовски со останатите колеги – градоначалници од земјата и странство, зеде учество во дискусијата посветена на техничките решенија за за промени на локално ниво. На дискусијата, Герасимовски покрај останатите локални политики на општината за заштита на животната средина и зелената агенда, ја претстави и одлуката за формирање на претпријатие за производство на електрична енергија за потребите на основните училишта и другите објекти на Општина Центар.

„Преку новото јавно претпријатие ќе започнеме со поставување на фотоволтаици за почеток на основните училишта, а потоа и на другите објекти кои се во надлежност на општината. Со работата на јавното претпријатие и поставувањето на фотоволтаиците на основните училишта, значително ќе заштедиме на сметки за топлинска и електрична енергија“, посочи Герасимовски.

На 14-тата седница, советниците едногласно ја поддржаа иницијативата за основање на општинско јавно претпријатие за производство на електрична енергија. На последната, 16-та седница на Советот на Општина Центар, советниците ги изгласаа планот и програмите за развој на Општина Центар за периодот од 2023-та до 2025-та година, во која е содржан и проектот за поставување на фотоволтаици на основните училишта.

Со поставувањето на фотоволтаици, општината значително ќе заштеди на трошоците за сметки затоплинска и електрична енергија во основните училишта, а средствата ќе може да се пренаменат во други активности важни за жителите на Општина Центар.