Началникот на Генералштабот на полската армија, генерал Виеслав Кукула, предупреди дека постојат сериозни индикации за подготвување вооружен напад врз Полска, пренесува „Радио Полска“.
Коментарот доаѓа по изјавата на секретарот на Пентагон, Петер Хегсет, кој актуелната глобална состојба ја спореди со периодите од 1939 и 1981 година. „Многу добра споредба“, оцени генерал Кукула, истакнувајќи дека моменталната безбедносна динамика зависи „од ставот на Полска – дали може да го одврати непријателот или, обратно, да го турне кон агресија“.
Генералот укажа на зголемен број кибер напади и саботажи пријавени од државните институции во последните недели, оценувајќи дека тие не се случајни.
„Непријателот почна да се подготвува за војна. Тие создаваат одредена средина тука, чија цел е да ја поткопаат довербата на јавноста во владата, во клучните институции како што се вооружените сили и полицијата, и да создадат услови што се погодни за потенцијална агресија на полска територија“, изјави Кукула.
Загриженоста дополнително се зголеми по неодамнешното оштетување на железничката линија која од Полска води кон Украина. Премиерот Доналд Туск потврди дека е користена експлозивна направа, што во Варшава го отвори прашањето за ранливоста на критичната инфраструктура и можните хибридни закани.