Ивана Коцевска, адвокатката на сопственикот на кабарето „Пулс“, на денешното судење го извести Судот дека добиле усно одобрување од притворот во Шутка за преместување на Дејан Јованов.
Обвинителството прочита известување од затворската управа во Куманово, според кое Јованов се пожалил пред судот, по што бил извршен разговор со него. Според информациите од затворот, тој немал забелешки за нечовечки или деградирачки однос од службените лица, туку се пожалил само на душекот.
„Во врска со добиените сознанија дека Јованов се жали за нечовечко и деградирачко однесување од службените лица во затворот Куманово, извршен е разговор со него. Јованов посочи дека нема никакви забелешки за односот од ниеден службеник. Имаше забелешка само за тоа што му е сменет душекот и дека пречесто се вршат претреси. Нема услови за специјален душек, а претресите се вршат редовно кај сите затвореници, особено по информации дека во собите се наоѓаат недозволени предмети, особено мобилни телефони. Бараме во иднина да не се земаат предвид ваквите паушални обвинувања кои не се поткрепени со факти, бидејќи влијаат на интегритетот на установата“, прочита адвокатката Коцевска.
На претходното рочиште пред Судот сведочеа членови на бендот ДНК и гости кои ја преживеале трагедијата, опишувајќи ги случувањата од ноќта на 16 март минатата година, кога во пожарот животот го загубија 63 лица, а повеќе од 200 беа повредени.
Во својство на сведок исказ даде придружниот вокал Ана Костадиновска. Одговарајќи на повеќекратни прашања од Обвинителството и од одбраната за тоа кој ги поставувал и активирал прскалките, таа изјави дека не знае и дека никогаш не видела кој ги местел во клубовите каде што настапувала групата ДНК, додавајќи дека е можно тоа да било задача на техничко лице од клубот.
Говорејќи за моментот кога избувнал пожарот, Костадиновска посочи дека кратко по почетокот на настапот почувствувала силна топлина, по што вокалот Панчо ги повикал присутните да излезат, но, како што рече, во првите моменти никој не ја сфатил сериозно ситуацијата.
Музичарот Горан Тонев, кој настапувал како надворешен соработник со бендот, изјави дека пиротехничките средства биле поставени уште пред да се качат на бината, но дека не знае кој ги поставил ниту кој ги активирал. Тој опиша дека огнот брзо се проширил, а просторот се исполнил со густ чад.
Според сведочењата на двајца преживеани гости, по активирањето на прскалките се запалил дел од таванот, што предизвикало паника и стампедо кон излезите.
Судскиот процес се одвива под засилени безбедносни мерки, во присуство на обвинетите, семејствата на жртвите и јавноста. Постапка се води против повеќе од 30 физички и три правни лица за тешки дела против општата сигурност.
Пожарот во дискотеката во Кочани избувна за време на настап на групата ДНК и се смета за една од најтешките трагедии во поновата историја на земјата. Со денешното рочиште продолжува доказната постапка со изведување сведоци предложени од Обвинителството.