Проширувањето на Европската Унија претставува една од најважните политики за долгорочната стабилност, безбедност и просперитет на европскиот континент, истакна претседателот на Собранието Африм Гаши на отворањето на 23. Конференција на парламентарни комисии за европски прашања/интеграции на земјите од Процесот на стабилизација и асоцијација на Југоисточна Европа, што се одржува во Струга.
Тој порача дека земјите од Западен Балкан припаѓаат во Европската Унија не само географски, туку и вредносно и историски, додавајќи дека регионалната соработка е клучна за забрзување на интегративниот процес.
Гаши нагласи дека во услови на сложени геополитички, економски и безбедносни предизвици, потребни се координирани европски политики, солидарност и силни партнерства. Според него, проширувањето е најдобар инструмент за зајакнување на мирот, демократијата, владеењето на правото и стабилноста во Европа.
Зборувајќи за регионалната поврзаност, тој истакна дека таа е клучен елемент за економска отпорност и одржлив развој, посочувајќи дека Северна Македонија има активна улога во унапредување на инфраструктурната и транспортната поврзаност во регионот.
Гаши посочи и дека улогата на националните парламенти во процесот на интеграција е од особено значење, со одговорност за носење квалитетни закони, парламентарен надзор и одржување дијалог со граѓаните, со цел побрзо приближување кон полноправно членство во ЕУ.
На отворањето се обрати и потпретседателот на Собранието Антонијо Милошоски, кој истакна дека регионалната соработка и реформската агенда остануваат клучни приоритети на државата, нагласувајќи дека реформите се корисни за сите земји од регионот и за унапредување на стандардите во сите области.
Тој изрази надеж дека процесот на проширување повторно ќе добие силен политички замав во Европската Унија и дека земјите од регионот ќе успеат заеднички да направат значајни чекори напред кон евроинтеграциите.