Шефот на обезбедувањето во швајцарскиот кантон Вале, Стефан Ганцер, денеска изјави дека барот во Кран Монтана, каде што на новогодишната ноќ избувна пожарот, имал повеќе од еден излез за евакуација. Сепак, повеќето посетители во паника не успеале да ги најдат и се обиделе да излезат преку главниот влез.
Во трагичниот инцидент загинаа 40 лица, а 119 се повредени. Точниот број на присутни во локалот засега не е познат.
„Повеќето луѓе не ги пронашле излезите за евакуација“, изјави Ганцер на прес-конференција.
На прашањето дали пена на таванот на барот придонела за ширење на пожарот, тој рече дека истрагата ќе утврди дали таа била поставена согласно прописите за безбедност и дали всушност имала улога во пожарот. „Прерано е да се каже дали била инсталирана според прописите или не“, додаде Ганцер.
Швајцарските власти, исто така, се сомневаат дека пожарот можеби бил предизвикан од роденденски прскалки поставени на шишиња со шампањ.