Непознато лице во раните утрински часови фрлило експлозивна направа врз семејна куќа во Нов Белград, предизвикувајќи значителна материјална штета на објектот, соопштуваат регионалните медиуми.
Експлозијата се случила околу 3:20 часот наутро на улицата Нехруова, при што од силината на детонацијата целосно е оштетена фасадата на куќата, скршени се прозорците, а видливи оштетувања има и на самата тераса.
Според првичните неофицијални информации, во моментот на нападот сопствениците на куќата се наоѓале внатре во објектот, но за среќа нема повредени лица.
Извори од истрагата брифираат дека ова не е прв инцидент насочен против истото семејство, со оглед на тоа што пред извесен период бил запален и автомобилот на сопственикот, кој бил паркиран на улицата пред куќата.
Полициски екипи веднаш излегле на терен и извршиле детален увид на местото на настанот, а надлежните служби во моментов интензивно работат на идентификување и пронаоѓање на сторителот.