Франција ги подготвува граѓаните: „Прирачник за преживување“ во случај на војна и катастрофи

Со оглед на зголемените геополитички тензии и непредвидливоста на природните катастрофи, француската влада презема проактивни мерки за да ги подготви своите граѓани. Во намера да ја зголеми отпорноста на нацијата, се планира на сите домаќинства да им се достави „прирачник за преживување“ со детални упатства како да постапуваат во ситуации на вооружен конфликт, природни катастрофи или здравствени кризи, објавуваат француските медиуми.

Иако прирачникот не ја спомнува Русија или војната во Украина, претходно овој месец францускиот претседател Емануел Макрон ја предупреди нацијата за „руската закана“ со која се соочува Европа додека САД постепено се повлекуваат од континентот.

Доколку предлогот биде одобрен, брошурата ќе биде испратена пред летот и ќе содржи информации слични на оние што веќе се наоѓаат на владината веб-страница објавена во 2022 година.

Таму има графички водич со упатства за тоа што да се спакува во комплети за итни случаи: најмалку шест литри флаширана вода, конзервирана храна, батерии и батериска ламба, медицински прирачник, радио на батерии, основни алатки, топла облека, полначи за телефон, готовина, фотокопии од документи итн.

Германија, исто така, спроведе слични мерки, со вежба минатата година за тестирање на подготвеноста на војската и цивилите. Како и во Франција, германските мерки се однесуваат на различни закани, вклучувајќи пандемии, природни катастрофи и напади.

Минатата година и нордиските земји почнаа да издаваат слични брошури со совети за граѓаните.